Von der Leyen shpreh mbështetje për armëpushim të menjëhershëm dhe pa kushte

Presidentja e Komisionit Evropian, Ursula von der Leyen, ka mbështetur publikisht propozimin për një armëpushim 30-ditor të plotë dhe pa kushte në Ukrainë, gjatë një deklarate nga Brukseli.

Ajo theksoi se tani është radha e Rusisë të përgjigjet dhe paralajmëroi për masa të reja ndëshkuese nëse armëpushimi nuk respektohet: “Ne jemi të përgatitur të ushtrojmë presion maksimal dhe të vendosim sanksione të reja nëse Rusia shkel marrëveshjen”.

Ndërkohë, Ministri i Jashtëm i Ukrainës, Andrii Sybiha, njoftoi se vendi është gati për të nisur menjëherë një armëpushim, ndërsa liderët e Francës, Gjermanisë, Britanisë së Madhe dhe Polonisë u mblodhën në Kiev për të përforcuar përpjekjet diplomatike drejt paqes.

Presidenti i Këshillit Evropian, António Costa, deklaroi në një postim në platformën X se “një Koalicion i Vullnetit”, që përfshin shtete nga e gjithë bota, është bashkuar për të mbështetur Ukrainën në mbrojtjen e saj dhe në arritjen e paqes.

Ai konfirmoi përkrahjen për propozimin e SHBA-së dhe Ukrainës si një hap konkret drejt bisedimeve paqësore./thashethemet.com