Vëllai që vrau për borxhin: E vërteta e fshehur pas masakrës

Prokuroria e Tiranës ka kërkuar burgim të përjetshëm për Arsen Muskurtin, autorin e një ngjarjeje të rëndë që ndodhi në gusht 2022 në Tiranë. Ai vrau me armë zjarri vëllain e tij, Dritan Muskurti, dhe bashkëshorten e këtij të fundit, Norën, brenda agjencisë së udhëtimeve “Nora Tours”.

Hetimet zbuluan se motivi i vrasjes lidhej me një konflikt të gjatë mes dy vëllezërve për shantazhe, borxhe dhe probleme familjare. Arsen Muskurti, i cili i detyrohej vëllait 150 mijë euro, kishte pasur debate të vazhdueshme me të, madje ishin përballur edhe në gjykatë. Vetëm katër ditë para krimit, Dritani kishte kërkuar urdhër mbrojtjeje për veten dhe bashkëshorten.

Më 2022, Arsen Muskurti hyri në agjencinë e vëllait dhe pas një debati verbal, qëlloi pesë herë, duke i lënë viktimat të vdekur në vend. Pasi u arrestua, ai tentoi të mashtronte hetuesit për vendndodhjen e armës së krimit, por pistoleta u gjet falë deklarimeve të njërës prej dy bashkëshorteve të tij, e cila tregoi kodin e kasafortës ku ishte fshehur arma.

Në përfundim të hetimeve, Prokuroria e Tiranës kërkon dënim maksimal – burgim të përjetshëm – për Arsen Muskurtin, i akuzuar për “vrasje për shkak të marrëdhënieve familjare”.