Rina Balaj ka ndarë detaje të sinqerta për marrëdhënien e saj me reperin Fero, me të cilin dikur solli disa nga bashkëpunimet më të njohura në skenën muzikore shqiptare. E ftuar në emisionin “Ora Shtatë” në Klan Kosova, këngëtarja theksoi se mes saj dhe Feros ka ekzistuar gjithmonë respekt, afërsi dhe mirëkuptim, pavarësisht ndryshimeve që të dy kanë kaluar në karrierë dhe në jetën personale.
“Unë me Feron mund të them lirisht se jemi rritur bashkë. Kemi qenë shumë të rinj kur kemi filluar të punojmë. Me mua ka qenë gjithmonë shumë i sjellshëm, dhe jo vetëm me mua, por edhe me shoqërinë time që janë krejt vajza,” – tha Rina, duke shtuar se gjatë viteve kanë pasur gjithmonë mbështetje të ndërsjellë.
Ajo tregoi se, ndonëse nuk kanë qenë në të njëjtin label, kanë ruajtur gjithmonë një raport të ngushtë dhe të sinqertë. “Unë Feron e shoh si vëllain tim, si Rigonin,” – u shpreh artistja.
Në lidhje me procesin gjyqësor që po zhvillohet ndaj Feros, i cili akuzohet nga ish-bashkëshortja Arbenita Ismajli për dhunë në familje, Rina zgjodhi të mos komentojë. “Nuk mund të gjykoj për diçka që nuk e kam parë vetë,” – përfundoi ajo.
