Pas një periudhe të gjatë larg televizionit, Einxhel Shkira ka vendosur të mos nxitojë për t’u rikthyer në ekran. Përmes një sesioni pyetjesh me ndjekësit në Instagram, moderatorja ka ndarë disa mendime të sinqerta mbi raportin e saj aktual me median dhe jetën personale.
“Nuk e di çfarë lloj njerëzish i duhen ekranit, por di që mua s’më duhet ekrani për të qenë më pranë jush apo para jush. Ka shumë mënyra për të bërë atë që do dhe për të thënë atë që mendon,” – është shprehur ajo.
Einxheli ka pranuar se, megjithëse ka projekte dhe dëshira të reja në plan, aktualisht fokusi i saj është tek jeta familjare, të cilën e konsideron përparësi absolute.
“Për momentin kam aspirata të tjera. E di që e kam thënë shpesh se së shpejti do të shihni diçka më shumë, por jeta familjare ka qenë prioritet. Po përpiqem të ndërtoj diçka që të ecë paralelisht me karrierën, pa më marrë kohën me familjen — që për mua është më e çmuara,” – shtoi ajo.
Kështu, duket se për Einxhelin ekrani mund të presë, ndërsa përkushtimi ndaj familjes dhe dëshira për të gjetur një ekuilibër të shëndetshëm mbeten në qendër të këtij kapitulli të ri të jetës së saj.
