Bebe Rexha mes ofendimeve dhe një humbjeje të dhimbshme
Këngëtarja shqiptaro-amerikane Bebe Rexha, 35 vjeçe, ka shpërndarë një rrëfim prekës për humbjen e një shtatzënie, pas një vale komentesh negative për pamjen e saj fizike gjatë debutimit në Met Gala.
Ajo u shfaq për herë të parë në këtë event me një fustan elegant të dizajnuar nga Christian Siriano dhe ndau me emocion foto nga nata, duke shkruar: “Met Gala im i parë” në rrjetet sociale, për të shprehur gëzimin e pjesëmarrjes.
Megjithatë, atmosfera e festës u prish shpejt nga komente të dëmshme, përfshirë një të reperes Azealia Banks, e cila komentoi në rrjetin X duke sugjeruar se ndryshimet trupore të Rexhës mund të ishin për shkak të një impianti kontraceptiv.
Si përgjigje, Bebe ndau një mesazh emocional, të cilin më vonë e fshiu, duke zbuluar se pas ndryshimeve trupore që kishte përjetuar, ajo po kalonte gjithashtu sfida të mëdha për shkak të sindromës së vezores policistike (PCOS), e cila e kishte vështirësuar shtatzëninë.
“Jam e lodhur nga komentet për peshën time,” shkroi ajo, duke shtuar: “Mbeta shtatzënë, por nuk shkoi siç shpresova. Kjo dhimbje ka qenë me mua në heshtje. Nuk i kam borxh askujt të vërtetën, por ndoshta tani do të mendoni dy herë para se të komentoni për trupin e dikujt.”
Pavarësisht se nuk dha detaje të mëtejshme për shtatzëninë, rrëfimi i Bebe Rexhës mori mbështetje të madhe dhe mesazhe ngushëllimi nga fansat në mbarë botën.
