Erion Isai konfirmon ndarjen nga bashkëshortja

Aktori dhe kryetari i Bashkisë së Ersekës, Erion Isai, ka konfirmuar se martesa e tij ka përfunduar. Në një postim publik, ai bën të ditur se ndarja ka ndodhur me dakordësi dhe është zyrtarizuar ligjërisht që në prill të vitit 2024.

“Prej Prillit 2024, me dakortësi dhe parime të përbashkëta, edhe zyrtarisht e ligjërisht ka nisur një kapitull i ri personal,” shkruan Isai, duke shtuar se vendosi të flasë për këtë çështje për shkak të interesit të madh nga publiku dhe media, për shkak të figurës së tij si person publik.

Në reagimin e tij, ai shpreh keqardhje për publikimin e dokumenteve gjyqësore të lidhura me ndarjen, duke theksuar se ato nuk kanë asnjë interes publik, veçanërisht kur në mes janë edhe dy vajzat e tij të mitura.

“Detyra më e bukur në botë është ajo e të qenit baba,” shkruan ai, duke shtuar se përkushtimi ndaj prindërimit është i pandalshëm dhe do të mundohet ta bëjë sa më mirë, si më parë e më shumë.

Isai thekson se do të vijojë të japë kontributin e tij si kryetar bashkie dhe si artist, gjithnjë i udhëhequr nga pasioni dhe përgjegjësia publike.

“Uroj që çdo ditë t’ja dal,” përfundon ai, duke shprehur mirënjohje për mbështetjen dhe duke u distancuar nga çdo ekspozim mediatik që prek jetën e tij private./thashethemet.com