Izraeli sulmon Iranin, shpërthen Operacioni “Luani që ngrihet”: Dronë, viktima civile dhe frikë nga një luftë e madhe

Ushtria izraelite ka bërë të ditur se Irani ka lëshuar rreth 100 dronë drejt territorit të saj, pasi Izraeli ndërmori një sulm të fuqishëm gjatë natës në zemër të Iranit.

Sipas Forcave të Mbrojtjes së Izraelit (IDF), operacioni përfshiu goditje ndaj objekteve bërthamore iraniane. Zyrtarë ushtarakë izraelitë pretendojnë se është vrarë edhe komandanti i Gardës Revolucionare, Hossein Salami, së bashku me disa komandantë të tjerë të lartë.

Televizioni shtetëror iranian ka raportuar se zona të banuara në Teheran janë goditur, duke shtuar se mes viktimave ka edhe civilë, përfshirë fëmijë. Këto informacione nuk mund të verifikohen në mënyrë të pavarur.

Kryeministri izraelit, Benjamin Netanyahu, ka konfirmuar se ky veprim është pjesë e operacionit të quajtur “Luani që ngrihet”, duke e quajtur Iranin një kërcënim të drejtpërdrejtë për “mbijetesën e Izraelit”.

Në vend është shpallur gjendje e jashtëzakonshme, ndërsa autoritetet paralajmërojnë se priten kundërsulme “në një të ardhme të menjëhershme”.

Ndërkohë, Irani ka akuzuar SHBA-në për mbështetje ndaj sulmeve izraelite, por kjo është mohuar kategorikisht nga Uashingtoni. Presidenti Donald Trump deklaroi se ishte në dijeni për operacionin përpara se të ndodhte, por theksoi se SHBA “nuk ka marrë pjesë në asnjë mënyrë”./thashethemet.com