Shqipëria dhe Serbia ndahen në paqe në Tiranë

Shqipëria ka barazuar 0-0 ndaj Serbisë në ndeshjen e tretë të vlefshme për kualifikueset e Botërorit. Në një stadium të mbushur plot dhe atmosferë të zjarrtë, kuqezinjtë zhvilluan një ndeshje me shumë raste, por pa arritur të finalizojnë.

Mundësia më e madhe për të kaluar në avantazh erdhi në fundin e pjesës së parë, kur Rey Manaj humbi një penallti të fituar nga kapiteni Elseid Hysaj. Goditja nga pika e bardhë u ndal nga portieri serb, duke zhgënjyer tifozët në tribunë.

Edhe Broja e Bajrami patën rastet e tyre për të zhbllokuar takimin, por saktësia mungoi në momentet vendimtare. Pavarësisht përpjekjeve të shumta, rezultati mbeti i pandryshuar deri në fund.

Ky ishte barazimi i parë për Shqipërinë në Grupin K, pas një fitoreje ndaj Andorrës dhe një humbjeje nga Anglia. Pas tri ndeshjeve, kuqezinjtë renditen në vendin e dytë me 4 pikë, ndërsa Anglia kryeson me 9. Serbia, që luajti ndeshjen e saj të parë kualifikuese, pozicionohet në vendin e katërt me një pikë./thashethemet.com