Tempull i humbur zbulon sekretet e një qytetërimi që u zhduk 1 mijë vjet më parë

Një tempull gjigant prej guri, i ndërtuar rreth 1,000 vjet më parë nga qytetërimi misterioz Tiwanaku, është zbuluar në malet e Andeve, në perëndim të Bolivisë. I njohur si Palaspata, ky vend i lashtë ndodhet mbi një kodër afër komunitetit Ocotavi dhe përbëhet nga 15 dhoma drejtkëndore të rreshtuara rreth një oborri qendror me përputhje astronomike me ekuinoksin.

Arkeologët besojnë se Palaspata nuk ishte thjesht një vend kulti, por një nyje strategjike ku kryqëzoheshin njerëz, mallra dhe besime. Gjetjet përfshijnë kupa ceremonialë “keru”, të përdorura për birrën tradicionale chicha, që sugjerojnë festa bujqësore dhe tregti me rajone më të ulëta, si luginat e Cochabamba-s.

Tempulli u ndërtua me gurë që peshojnë deri në 100 tonë, dëshmi e një shoqërie tepër të organizuar që arriti kulmin midis viteve 630–950 pas Krishtit, përpara se të zhdukej rreth vitit 1000. Zbulimi konsiderohet i një rëndësie të madhe për trashëgiminë kulturore të zonës dhe pritet të sjellë më shumë dritë mbi këtë qytetërim të lashtë që kishte ndërtuar monumente të mrekullueshme përreth liqenit Titikaka.