Trump: Putin është çmendur. Nëse merr gjithë Ukrainën, Rusia do të shkatërrohet

Presidenti amerikan Donald Trump ka paralajmëruar se një përpjekje nga Vladimir Putin për të pushtuar të gjithë territorin e Ukrainës do të çojë në “rrënimin” e Rusisë. Në të njëjtën kohë, ai ka kritikuar edhe presidentin ukrainas Volodymyr Zelenskyy për retorikën e tij.

Në një postim të bërë mbrëmjen e së dielës në rrjetin e tij social Truth Social, Trump tha se kishte pasur gjithmonë një “marrëdhënie shumë të mirë” me presidentin rus Vladimir Putin, por shtoi se “diçka ka ndodhur me të”.

“Ai është bërë krejtësisht i ÇMENDUR! Gjithmonë kam thënë që ai do të gjithë Ukrainën, jo vetëm një pjesë të saj, dhe ndoshta kjo po rezulton të jetë e vërtetë. Por nëse ai e bën këtë, do të çojë në rrënimin e Rusisë!”, shkroi Trump.

Deklaratat e tij erdhën në një ditë të tensionuar, teksa bombardimet ruse ndaj qyteteve ukrainase janë intensifikuar ndjeshëm. Presidenti aktual amerikan, i cili foli gjithashtu të dielën, tha se ishte “shumë i habitur” nga përshkallëzimi i sulmeve ruse, duke nënvizuar përpjekjet që ka bërë për të ndërmjetësuar një armëpushim.

Kur u pyet nga një gazetar nëse po shqyrtonte vendosjen e sanksioneve të reja ndaj Moskës, Trump u përgjigj prerazi:

“Absolutisht. Ai po vret shumë njerëz. Çfarë dreqin i ka ndodhur atij?”

Por krahas kritikave ndaj Putin, Trump nuk kurseu as presidentin ukrainas Zelenskyy. Në postimin e tij, ai e akuzoi këtë të fundit se po dëmton vendin me deklaratat e tij të ashpra.

“Zelenskyy nuk po i bën asnjë nder vendit të tij me mënyrën si flet. Çdo gjë që del nga goja e tij shkakton probleme. Nuk më pëlqen dhe duhet të ndalojë.”

Këto deklarata janë ndër më të fortat që Trump ka bërë në lidhje me luftën në Ukrainë që nga fillimi i saj, dhe përbëjnë një ndarje të qartë nga qëndrimet e mëparshme të tij, të cilat shpesh janë interpretuar si të buta ndaj Kremlinit./thashethemet.com