Vuçiç nga Tirana: Pas takimit me BE-në, Serbia rikthen shpresën për të ardhmen evropiane

Presidenti i Serbisë, Aleksandër Vuçiç, pas mbërritjes në Tiranë për Samitin Evropian, deklaroi se e kishte pritur që do të sulmohej pas vizitës në Moskë, por theksoi se do të marrë përgjegjësinë për çdo gjë për të mos lejuar që Serbia të paguajë pasojat.

Ai shprehu optimizëm për rrugën evropiane të Serbisë, duke theksuar ndryshimet pozitive në situatën gjeopolitike krahasuar me vitin 2022.

Vuçiç theksoi se ekziston një mundësi më e madhe për përparim në integrimin evropian, falë harmonizimit mes SHBA-së dhe Evropës.

Në vijim, ai njoftoi për takime të rëndësishme që do të ketë me udhëheqësit evropianë, përfshirë Presidentin e Parlamentit Evropian Antonio Costa, Ursula von der Leyen dhe Donald Tusk.

Presidenti u shpreh i kënaqur me bisedimet tre-orëshe dhe tha se besimi dhe shpresa për të ardhmen evropiane të Serbisë janë rigjallëruar.

Në lidhje me kërkesat për zgjedhje të parakohshme dhe radikalizimin e protestave, Vuçiç deklaroi se nuk ka marrë asnjë kërkesë zyrtare nga institucionet për këtë çështje, pavarësisht pretendimeve të kundërta.

Ai shtoi se situata politike është përkeqësuar nga ato që ai i quajti “revolucione me ngjyra” dhe politika e papërgjegjshme.

Vuçiç kritikoi gjithashtu krijimin e komiteteve komunale, duke i cilësuar ato si aktivitete kriminale që shmangin institucionet zyrtare.

Ai përmendi se zgjedhjet do të mbahen brenda një vit e gjysmë, kur institucionet kompetente të marrin vendimin. Vuçiç përfundoi duke ftuar qytetarët të marrin pjesë në një tubim të madh në Nish./thashethemet.com