Zbulim i rrallë që mund të zbulojë sekretet e mbretërve të parë

Një zbulim i rrallë arkeologjik pranë qytetit Asuan në jug të Egjiptit ka ngritur interesin e studiuesve në mbarë botën. Sipas raportimeve, një gdhendje e lashtë shkëmbore, e ruajtur në gjendje të shkëlqyer, mund të hedhë dritë mbi fillesat e pushtetit faraonik dhe procesin e bashkimit të Egjiptit të lashtë.

Gdhendja paraqet një figurë të ulur në një barkë të stolisur, e cila tërhiqet nga pesë persona, ndërsa një tjetër e drejton me një lopatë. Figura e ulur paraqet tiparet e hershme të faraonëve, përfshirë mjekrën e gjatë dhe të mprehtë, simbol klasik i mbretërisë egjiptiane.

Studiuesit besojnë se kjo vepër daton rreth mijëvjeçarit të katërt para Krishtit – shekuj përpara ndërtimit të piramidave – dhe lidhet me periudhën e Dinastisë së Parë, në kohën e tranzicionit drejt një shteti të unifikuar nën faraonin Narmer, rreth vitit 3100 p.e.s.

Megjithatë, sipas autorit të studimit, Dr. Dorian Vanhulle, figura nuk përfaqëson vetë faraonin Narmer, por ndoshta një anëtar të elitës politike dhe ushtarake të asaj kohe. Identiteti i saktë i këtij personazhi mbetet ende mister.

Zbulimi është bërë në një zonë me masive guri ranor, që është përdorur si gurore që nga viti 330 p.e.s. dhe deri më sot. Edhe pse në këtë vend janë gjetur gdhendje nga periudha të ndryshme historike, kjo është e para që i përket periudhës së parë dinastike.

Barka e paraqitur në gdhendje është një element i zakonshëm në artin egjiptian të lashtë, por në këtë rast, simbolika e saj lidhet me fuqinë politike dhe përhapjen e ndikimit nga elita sunduese. Për më tepër, pozicioni i veprës, me pamje nga lumi Nil dhe drejtimi verior i barkës, sugjerojnë një përzgjedhje të qëllimshme për të komunikuar mesazh pushteti.

“Kompozime të tilla shkëmbore u kthyen në një mjet për autoritetet për të shënuar territorin, për të komunikuar dhe për të pohuar pushtetin,” thekson Dr. Vanhulle, duke shtuar se ky zbulim është një hallkë e rëndësishme për të kuptuar më mirë procesin kompleks të formimit të shtetit egjiptian.

Ky zbulim pasuron më tej të dhënat për një periudhë historike ende të mbuluar me mister, duke sjellë më pranë të vërtetën për lindjen e një prej qytetërimeve më madhështore të njerëzimit.